中央聖學子

聖誕佳節...

祝大家快快樂樂！

{{ : )

CREATE HK

「創意康港」標誌設計比賽得獎名單昨日公佈，公開組冠軍得主為劉宇衡先生（Mad Studios）設計的「火花」（見下圖）。其創作理念如下：

宇宙萬物的創造源於一點火花[1]。以火花比喻一切創作活動[2]，最為貼切。創作往往始於電光石火的靈感湧現、忽有所悟，亦即讓創作人驚歎“我想到了”的一剎[3]。上圖的火花標誌，表示香港是一個能點燃[4]無限創意的地方。三點[5]火花代表主要的靈感泉源，即天、地和人[6]；思想、身體和靈魂；知性、感性和靈性[7]。這些都是一切創作活動的基礎[8]。

嘩！真係唔講唔知，堅到呢。

真係好鍾意呢類設計比賽，極富娛樂性。多謝嗰班評審（靳埭強先生, 彭志江先生, 黃光銳先生, 周婉美小姐, 蕭如彬太平紳士, 馮永業先生）嘅慧眼同慧根，選出咁勁嘅撈稿代表康港創意界。

之前仲睇死個比賽出唔到堅嘢，今次真係大跌眼鏡。

註：[1]聖經定霍金講過？[2]比喻衝突、漏電又如何？[3]睇睇下 Batman – The Dark Knight...“呀！我想到了！”[4]好似「熄滅」貼切啲喎。[5]邊度呀？！[6]My favourite!!! [7]講晒。[8]點止基礎呀，直頭係「一切創作活動的全部」啦。

延伸閱讀：
有班曳人响 Facebook 惡搞冠軍作品。真曳！
《撈稿之禪述》

金帆啟示錄

2007年7月，康港廣告商會 (4As) 的金禧誌慶《省靚招牌五十年》疑似抄襲英籍攝影師 Philip Toledano 舊作，熱爆全行。

2009年11月，有「本地廣告界奧斯卡」之稱的金帆廣告大獎，得主 Leo Burnett Hong Kong 的「Sweat Campaign」鬧出疑似臨摹英國攝影師 John Ross 舊作，再起嘩然。

「創意十月」才剛剛過去，本地創意工業龍頭大阿哥就來個如此的「創意宣言」，實在別具創意兼令人錯愕。事件現正如常靜悄悄地被淡忘。媒體要報導的已報過了；網上要討論的已論過了；被剽事主亦已回應過了；涉剽者都叫做解釋過了；政府要資助的也資過了。一切一切跟過去的「家常小抄」結局都大同小異，吵鬧過後，冇人會名譽掃地，一切都變得見仁見智。然後，準備集體失憶。

所謂「經一事長一智」，與其扮脫俗企响道德高地痛駡世風日下，不如惗惗事件對自己有乜啟發，會比較合時宜。問問自己：自己攞過大獎冇？冇，點解？創意創意，自己究意懂得何謂創意冇？點解人哋做大客、賺大錢、攞政府資助兼攞晒大獎？究竟自己一直所「信奉」的嗰套，仲 work 唔 work？！

經仔細思量，發覺上述兩單疑似抄襲大嘢，跟一些「家常小抄」有一個共通的「自圓其說」位。就是每當疑兇被追問案發經過時，佢都會牽強地托辭狡辯道：「係，我哋唔排除（或承認）在『創作』過程中，曾經參考過某某的作品。但那只不過是云云 reference 中的其中一則。重點在於，我哋個 idea 係新的。」縱使個 idea 都其實麻麻地新，但喺嗰個時候，心照不宣，沒有甚麼重點不重點了。曾聽過一位愛好版權所有的設計達人向後輩解釋說道：「如果你哋知道 professional 係點做嘢的話，你就會知道，搵 reference，其實好普遍。」Referencing 何時成為 copying 的變奏？

在學校，正路地，先想好 idea，然後惗惗如何做好個 execution。新穎破格富創意為之好 –– 理想地 –– idea 與 execution 都要好。揭書搵 reference 參考參考有時都少不了（尤其做廣告），但相信教授們應該唔會教學生：若果搵到一個異常合適的 reference，不妨改少少或照抄，用嚟做 idea 的 execution。反之，避得就避，免得瓜田李下。但原來，呢類正路正派已經被視為「學院派」，非「professional」的做法。原來，學校與職場，這樣脫了節。

4As 作為創意工業龍頭組織，她的所作所為，有影響力，有指導意味。今後，本地職業創作人，再不須要受制於無謂的道德枷鎖，堅持甚麼學術或知識份子風骨，甚至甚麼禮義廉恥。擁抱一國一制，一於豁然做假抄襲。真爽！多謝 4As，從此「創作」空間廣多了！

要知道，好多山寨作品，idea 都好新唷！

「肯德基」「吉阿婆」（咪心邪）

金（鋪真）帆

Advertising Agency: Leo Burnett, Hong Kong
Executive Creative Director: Connie Lo
Creative Director: Miranda Shing
Art Directors: Miranda Shing, Timothy Li
Copywriters: Paul Yu, Cyrus Ho

「疑似失竊單位為英國攝影師 John Ross，他為樂隊 Manic Street Preachers 名為 LifeBlood 的大碟創作及拍攝的影像」《蛇果》畢明《創意工業冇創意》

... ... ...

兩年前（2007）康港廣告商會 (4As) 的「省靚招牌五十年抄襲事件」震驚中外。今年（2009），有「康港廣告界奧斯卡」之稱的「金帆廣告大獎」大獎得主，又鬧出大鑊嘢！金帆金帆，今鋪都咪話唔煩。（如果尚有廉恥的話）

多年來，有個疑問 —— 唔知點解啲廣告人成日自居最有創意，成日串串貢咁，將做廣告塑造到好似好超然咁。「我淨係惗 concept （gimmick）㗎咋，砌稿呢啲下欄嘢我唔做㗎。」。甚至聽聞有從業、學生、教師以「狗眼看人低」之態傲視其他創意工業界別。「做唔掂廣告，你就返去做 graphic design 啦。」「Graphic designer 淨係惗點整靚啲嘢，我哋？！度橋食腦㗎嘛！（咀秒秒狀）」。又聽聞，有修讀廣告的大學生，以「齋惗 concept」為榮，若被要求提供較完整的 execution 或 finished artwork，就會以「非工作範圍」為由拒絕。據了解，那是老師真傳的。

無意一竹篙打一船人，但行內人，一定知我講緊乜。經過上述兩鑊甘一甘的出醜，真係希望嗰啲目中無人嘅廣告友收皮一下... 唔係，係收殮一下。無知唔係大晒，account 大亦不足以連人格也奉上。

面係人畀，架係自己丟。（自丟兩次，還未夠？）